ချင်းပြည်နယ် ပလက်ဝမြို့မှ
ကြိုဆိုပါ၏

ပလက်ဝမြို့

ပလက်ဝမြို့သည်  ကုလားတန် မြစ်ကြောင်းတစ်လျှောက်   ပင်လယ်ရေ မျက်နှာပြင်အထက် ( ၅၄ ) မီတာတွင် တည်ရှိပြီး ချင်းပြည်နယ်မြို့များထဲတွင် ရေကြောင်း၊ ကုန်းကြောင်းဖြင့် သွားရောက်နိုင်သော မြို့ဖြစ်ပါသည်။ ပလက်ဝမြို့၏ ရိုးရာများ၊ လူနေမှုပုံစံများ နှင့် ရိုးရာအစားအစာများသည် ဧည့်သည်များကို စိတ်ကျေနပ်စေပါသည်။ ပလက်ဝမြို့ကို ရခိုင်ပြည်နယ် ကျောက်တော် နှင့် ချင်းပြည်နယ် မတူပီ-ဆမီးလမ်းမှ တစ်ဆင့် သွားရောက် လည်ပတ်နိုင်ပါသည်။

ပလက်ဝမြို့နယ်အား ယခုအချိန်တွင် အသွားအလာကန့်သတ်ထားပါသည်။

စိတ်ဝင်စားဖွယ်ရာများ

ကီမိုတောင်

ကီမိုတောင်သည် ချင်းပြည်နယ် ပလက်ဝမြို့မှ ( ၂၀ ) မိုင်ခန့်ကွာဝေးပြီး တင်ဘုန်းရွာအနီးတွင် တည်ရှိပါသည်။ ၎င်းသည် ပင်လယ်ရေမျက်နှာပြင်အထက်အမြင့်ပေ ( ၁၃၀၁ ) မီတာ၌ ရှိပါသည်။ ၎င်း၏ ထူးခြားသော လခြမ်းပုံသဏ္ဏာန်နှင့် တောင်ဧရိယာတလျှာက်အတွင်း သစ်ပင်ပန်းမန်များ၊ ကျေးငှက်တိရစ္ဆာန်များ ပေါကြွယ်ဝသောကြောင့် လူသိများပါသည်။ တောင်အလယ်ရှိ စီးဆင်းနေသော ချောင်းအတွင်း ငါးမျိုးစုံ၊ ဖားငယ်များ၊ ပုစွန်များနှင့် တောင်ပေါ်တွင်လည်း အောက်ချင်းငှက်များ၊ တောင်လိပ်များကို တွေ့မြင်နိုင်ပါသည်။

အောက်ချင်းငှက်​

အောက်ချင်းငှက်သည် ချင်းပြည်နယ်အတွင်း နေထိုင် ကျက်စားသော ငှက်မျိုးများဖြစ်ပါသည်။ အထီးနှင့်အမ စုံတွဲ အတူတကွ နေထိုင်လျက်ရှိပြီး ယင်းတို့၏ သစ္စာရှိမှုနှင့် မေတ္တာတရား ခိုင်မြဲမှုများအတွက် လေးစားဂုဏ်ပြုရသော ငှက်များဖြစ်ပါသည်။ ထို့ကြောင့် ချင်းလူမျိုးတို့၏ သစ္စာရှိပုံ၊ ရဲစွမ်းသတ္တိရှိပုံကို အောက်ချင်းငှက်ဖြင့် ဖော်ကျူး၍ ချင်းပြည်နယ်၏ ပြယုဂ်အနေဖြင့် အသုံးပြုကြပါသည်။