လောက်နူးမြေ ရိုးရာယဉ်ကျေးမှုနှင့် ခေါ်နူးစုမ်တောင်ဇလပ်ပန်းပွဲတော်သည် ချင်းပြည်နယ်၊ ကန်ပက်လက်မြို့၌ ၂၀၂၀ပြည့်နှစ်မှ စတင်၍ တောင်ဇလပ်ပန်းများ မြိုင်မြိုင်ဆိုင်ဆိုင်ပွင့်သည့် ဇန်နဝါရီလတွင် ခရီးသွားလုပ်ငန်း မြှင့်တင်ရေး ပွဲတော်အနေဖြင့်လည်းကောင်း၊ လောက်နူးမြေ (ကန်ပက်လက်) ရိုးရာယဉ်ကျေးမှုဓလေ့ထုံးစံများကို ဖော်ထုတ်ရန် အတွက်လည်းကောင်း၊ ခေါ်နူးစုမ်တောင်နှင့် သဘာဝပတ်ဝန်းကျင် ထိန်းသိမ်းစောင့်ရှောက်ရေး အတွက်လည်းကောင်း နှစ်စဉ်ကျင်းပသည့်ပွဲတော် ဖြစ်ပါသည်။ ခရီးသွားဧည့်သည်များအနေဖြင့် ချင်းပြည်နယ် လောက်နူးမြေရိုးရာယဉ်ကျေးမှုနှင့် ခေါ်နူးစုမ် တောင်ဇလပ်ပွဲတော်တွင် လောက်နူးမြေအတွင်းနေထိုင်ကြသည့် ချင်းလူမျိုးစုများ ဖြစ်ကြသော မွင်း၊ ရာ့၊ ဒါးရင်ဒူး၊ ဒိုင်နှင့် ဉ(ပ်)ပူး လူမျိုးများ၏ ရိုးရာအဝတ်အစားများ၊ အသုံးအဆောင်ပစ္စည်းများနှင့် အကအလှများကို ပွဲတော်ကျင်းပသည့် နေရာတွင် မြင်တွေ့ ခံစားနိုင်မည် ဖြစ်ပြီး တမူထူးခြားသော ဒေသထွက် ထောပတ်သီးဟင်းလျာများအပြင် ချင်းရိုးရာ အစားအစာမျိုးစုံကိုလည်း မြည်းစမ်းခွင့် ရရှိမည်ဖြစ်ပါသည်။ သဘာဝကို ချစ်မြတ်နိုးသော၊ တောင်တက်ရတာ ဝါသနာပါသော ခရီးသွားဧည့်သည်များ အနေဖြင့်လည်း ခေါနူးစုမ်တောင်နှင့် တောင်ဇလပ်ပန်းထိန်းသိမ်းစောင့်ရှောက်ခြင်းဆိုင်ရာ ပြခန်း၊ ကဗျာ၊ ဆောင်းပါးနှင့် စာစီစာကုံးများလေ့လာနိုင်မည့်အပြင် မြန်မာနိုင်ငံ၏ အမြင့်ဆုံးမြေသားတောင်ဖြစ်သည့် တောင်တန်းများ၏ မိခင်အဖြစ် တင်စားကြသော ခေါနူးစုမ်တောင်ထိပ်သို့ တောင်ဇလပ်ပန်းရောင်စုံတို့ကို ကြည့်ရင်း ခြေလျင်လမ်းလျှောက်ပြိုင်ပွဲတွင်လည်း ဝင်‌ရောက်ပါဝင် ဆင်နွှဲနိုင်မည်ဖြစ်ပါသည်။ ထို့အပြင် ချင်းတို့၏ ရိုးရာပွဲတော်များထဲမှ လူသိများသော ရိုးရာလုံယူးကျောက်ပျဉ်ချီပွဲတော်ကို လည်း ဝင်ရောက်ဆင်နွှဲနိုင်မည်ဖြစ်သောကြောင့် ချင်းပြည်နယ်သို့ လာရောက်လည်ပတ်မည့် ခရီးသွားဧည့်သည်များအနေဖြင့် လောက်နူးမြေ ရိုးရာယဉ်ကျေးမှု နှင့် ခေါ်နူးစုမ်တောင်ဇလပ်ပန်းပွဲတော် ကို ပါဝင် ဆင်နွှဲ ကြပါရန် ဖိတ်ခေါ်ရင်း ၂၀၂၀ပြည့်နှစ်တွင် ကျင်းပခဲ့သော လောက်နူးမြေ ရိုးရာယဉ်ကျေးမှု နှင့် ခေါ်နူးစုမ်တောင်ဇလပ်ပန်းပွဲတော်၏ ဓာတ်ပုံတစ်ချို့ကို တင်ဆက်ပေးလိုက်ပါသည်။