The Rih Lake Tour (5D/4N)

ခရီးစဉ်အကျဉ်း

ဤခရီးစဉ်သည် ခရီးသွားဧည့်သည်များအနေဖြင့် ဗြိတိသျှနယ်ချဲ့စဉ်က ရှေးဟောင်း သမိုင်းကြောင်းများနှင့်အတူ ချင်းလူမျိုးတို့၏ ရိုးရာယဉ်ကျေးမှု နှင့် လူနေမှုပုံစံများကို တွေ့ကြုံခံစားနိုင်စေရန် ရည်ရွယ်ပါသည်။ ခရီးစဉ်တွင် ယဉ်ကျေးမှု နှင့် သမိုင်းကြောင်းအရ အရေးပါသည့် တာရွှန်းကျေးရွာ၌ တည်းခိုနေထိုင်နိုင်မည်ဖြစ်ပါသည်။ အဆိုပါ ခရီးစဉ်သည် လူထုအခြေပြုခရီးသွားလုပ်ငန်းမှ ဒေသခံပြည်သူလူထုကို ထောက်ပံ့ပေးရန်ဖြစ်ပါသည်။

တာရွှန်းကျေးရွာသည် ဖလမ်းမြို့နှင့် (၄)မိုင်အကွာ၌ ရွာ(၃)ရွာပတ်လည်ဝန်းရံလျက်ရှိပြီး မဏိပူရ်မြစ်သည် ရွာ၏ မြောက်ဘက်မှ အရှေ့ဘက်သို့ စီးဆင်းလျက်ရှိပါသည်။ ထိုရွာသည် ဖလမ်းမြို့နယ်တွင် သက်တမ်း အရင့်ဆုံးကျေးရွာဖြစ်ပြီး ၁၈၉၂ ခုနှစ်အထိ ဗြိတိသျှတို့၏ ကျူးကျော်မှုကို ဆန့်ကျင်တိုက်ခိုက်ခဲ့သည့် ဗိုလ်ကြွန်ဘိခ် (ခ) ဗိုလ်ဆွန်ပတ်၏ ကျေးရွာအဖြစ်လည်း ကျော်ကြားပါသည်။ ၁၈၅၆ – ၁၈၉၂ အတွင်း ဗိုလ်ကြွန်ဘိခ် ဦးဆောင်သည့် တာရွှန်းကျေးရွာသည် ချင်းတောင်တန်းဒေသ၌ အိမ်ထောင်စုပေါင်း ၅၀၀ ရှိပြီး အကြီးဆုံးနှင့် အာဏာအရှိဆုံးကျေးရွာဖြစ်ပါသည်။ တာရွှန်းကျေးရွာသည် ချင်းတောင်တန်းဒေသ၌ ဗြိတိသျှတို့၏ ကျူးကျော်သိမ်းပိုက်မှု၏ နောက်ဆုံးကာကွယ်ရေးဖြစ်ခဲ့ပါသည်။

ဧည့်သည်များအနေဖြင့် ချင်းရိုးရာလူနေမှုပုံစံ၊ အံ့ဩဖွယ်ကောင်းသော မြင်ကွင်းများ၊ ရင်သပ်ရှုမောဖွယ် ကောင်းသည့် တောင်တန်းများ/မြစ်များနှင့် ကျယ်ပြန့်သော တောင်တန်း–သစ်တောများကို တွေ့မြင်နိုင်မည်ဖြစ်ပါသည်။ ဧည့်သည်များသည် ချင်းတောင်တန်း၏ တတိယအမြင့်ဆုံးတောင်ဖြစ်သည့် ဇိန်မှုတောင်၌ တောင်တက်နိုင်မည်ဖြစ်ပါသည်။ ခရီးစဉ်တွင် ချင်းတောင်တန်းဒေသ၌ အစိုးရမှ ပထမဦးဆုံး အုပ်ချုပ်သည့် မြို့ဖြစ်သည့် ဖလမ်းမြို့တဝိုက်နှင့် ယခု ချင်းပြည်နယ်၏ မြို့တော်ဖြစ်သော ဟားခါးမြို့တို့ကိုလည်း လည်ပတ်နိုင်မည် ဖြစ်ပါသည်။

ပထမနေ့                      ရန်ကုန် – ကလေး (လေကြောင်းလိုင်း)

နေ့လည်ခင်း လေယာဉ်ဖြင့် ရန်ကုန်မှ ထွက်ခွာပါ။ ကလေးမြို့၌ ညစာစားပြီး ညအိပ်တည်းခိုခြင်း (သို့မဟုတ်) ခရီးဆက်ရန် ကားငှားပါ။

ဒုတိယနေ့                    ကလေး – တာရွှန်းကျေးရွာ

အကယ်၍ သင်သည် ကားငှားပြီး ကလေးမြို့၌ ညအိပ်ပါက –

သင်သည် ကလေးမြို့တွင် မနက်စာ သုံးဆောင်ပြီးနောက် ဖလမ်းမြို့သို့ (၄)နာရီကြာ ကားမောင်းသွားရမည်။ လမ်းတစ်လျှောက်တွင် ချင်းပြည်နယ်၏ အမှတ်အသားဖြစ်သည့် တောင်ဇလပ်ပန်း အချို့ကို မြင်တွေ့ရလိမ့်မည်။ ထို့နောက် နေ့လည်စာ သုံးဆောင်နိုင်မည့် လုံဘန်ရွာသို့ ရောက်ရှိမည်ဖြစ်သည်။ လုံဘန်ရွာသည် ပင်လုံ ညီလာခံ၌ လက်မှတ်ရေးထိုးရာတွင် ပါဝင်ခဲ့သည့် ဝဏ္ဏကျော်ထင် ဦးလူရ်မှုန်၏ ဇာတိဖြစ်သည်။ ထို့နောက် ချင်းအမွေအနှစ်ကျေးရွာ နှင့် လူထုအခြေပြု ခရီးသွားလုပ်ငန်းကျေးရွာဖြစ်သည့် တာရွှန်းကျေးရွာသို့ ရောက်ရှိမည်ဖြစ်ပြီး (၂၁)ရာစုအတွင်းရှိ ချင်းရိုးရာအိမ်များကို တွေ့မြင်နိုင်သည့် တစ်ခုတည်းသော နေရာလည်းဖြစ်သည်။ အိမ်အားလုံးသည် ပုံမှန်အားဖြင့် ချင်းရိုးရာပုံစံဖြစ်ပြီး ချင်းတော်လှန်ရေးခေါင်းဆောင်၏ အိမ်ကိုလည်း တွေ့မြင်နိုင်မည်ဖြစ်သည်။ ကျေးရွာရှိ ရှေးခေတ်အိမ်အဟောင်းများနှင့် သမိုင်းဝင်နေရာများသည် လာရောက် လည်ပတ်သူများအတွက် ၎င်းတို့၏ ရှည်လျားသော သမိုင်းကြောင်း၌ စိတ်ဝင်စားဖွယ်အဖြစ်အပျက်များစွာကို ပြန်လည်အမှတ်ရစေမှာ အသေချာပင်ဖြစ်သည်။ အဆိုပါ လူထုအခြေပြုခရီးသွားလုပ်ငန်းသည် the Backyard ခရီးသွားလုပ်ငန်း ကုမ္ပဏီနှင့် UK aid တို့၏ ပူးပေါင်းဆောင်ရွက်မှုဖြင့် ၂၀၁၇ ခုနှစ်၌ အကောင်အထည်ဖော် ဆောင်ရွက်ခဲ့ပါသည်။

ရွာကိုရောက်သည့်အခါ လူထုအခြေပြုခရီးသွားလုပ်ငန်းရှိ ကျေးရွာအိမ်၌ ခေတ္တနားပြီးပါက ကျေးရွာအတွင်း လမ်းလျှောက်ခြင်း၊ ရွာခံဧည့်လမ်းညွှန်မှ ကျေးရွာသမိုင်းကြောင်း ရှင်းလင်းပြသခြင်း၊ ညအခါ မီးပုံပွဲနှင့်အတူ ရိုးရာအကများ၊ ချင်းရိုးရာ အစားအစာများကို ခံစားနိုင်မည် ဖြစ်ပါသည်။ ကျေးရွာရှိ ဒေသခံအိမ်၌ ညအိပ်ရပ်နားနိုင်မည်ဖြစ်ပါသည်။

တတိယနေ့                  တာရွှန်း – မဏိပူရ်မြစ်သို့ ပျော်ပွဲစားထွက်ခြင်း ( ခြေလျင်ခရီး )

ကျေးရွာအနီးရှိ မဏိပူရ်မြစ်သို့ ဒေသခံဧည့်လမ်းညွှန်နှင့်အတူ ပျော်ပွဲစားသွားရောက်နိုင်ပါသည်။ မနက်စာ စားပြီးနောက် မြစ်သို့ ခြေလျင်ခရီး သွားရောက်ရမည် ဖြစ်ပါသည်။ မဏိပူရ်မြစ်၌ ရေကူးခြင်း၊ ရိုးရာပုံစံ အမဲလိုက်ခြင်း နှင့် ငါးဖမ်းခြင်းများကို ဆောင်ရွက်ပြီးနောက် အသင့်ယူလာသည့် နေ့လည်စာကို မြစ်ဘေး၌ သုံးဆောင်နိုင်မည်ဖြစ်သည်။ ဒေသခံအိမ်၌ ညစာစားပြီးနောက် ညအိပ်ရပ်နားရမည် ဖြစ်ပါသည်။

စတုတ္ထနေ့                    တာရွှန်း – ဇိန်မှုတောင် – ဟားခါး (မော်တော်ကား + ခြေလျင်)

ကျေးရွာ၌ မနက်စာ သုံးဆောင်ပြီးနောက် ဇိန်မှုတောင်တက်ရန် မော်တော်ကားဖြင့် တောင်ခြေစခန်းဖြစ်သည့် တလန်ဇာရ်ကျေးရွာသို့ တစ်နာရီခွဲခန့် မောင်းရပါသည်။ ဒေသခံဧည့်လမ်းညွှန်နှင့်အတူ ဇိန်မှုတောင်ထိပ်သို့ ခြေလျင်တောင်တက်သွားရောက်ရမည်ဖြစ်သည်။ ဇိန်မှုတောင်သည် ပင်လယ်ရေမျက်နှာပြင်အထက် အမြင့် ပေ ၈,၈၁၄ တွင် တည်ရှိပြီး ချင်းပြည်နယ်၌ တတိယအမြင့်ဆုံးတောင်ဖြစ်ပါသည်။ တောင်တက်ခြင်းအနေဖြင့် ၂–၃ နာရီကြာမြင့်နိုင်ပြီး တောင်ထိပ်၌ နေ့လည်စာသုံးဆောင်ခြင်း၊ အနားယူခြင်းများ ဆောင်ရွက်နိုင်ပါသည်။ တောင်ခြေစခန်း ပြန်ရောက်ပါက ဟားခါးမြို့သို့ ဆက်လက် ခရီးထွက်ခွာနိုင်မည် ဖြစ်သည်။ ဆုတောင်း တောင်မှတဆင့် လှမ်းမျှော်ကြည့်ပါက ရုန်းတောင်အောက်တွင်  တည်ရှိနေသည့် ဟားခါးမြို့အလှကို တွေ့မြင်ရမည်ဖြစ်သည်။ ညစာအား ဒေသစားသောက်ဆိုင်တွင် သုံးဆောင်နိုင်ပြီး တည်းခိုခန်း၌ ညအိပ်ရပ်နားရမည် ဖြစ်သည်။

ပဥ္စမနေ့                        ဟားခါးမြို့တဝိုက် ကားဖြင့် လည်ပတ်ခြင်း

မနက်စာ သုံးဆောင်ပြီးနောက် ကားဖြင့် ဟားခါးမြို့တဝိုက် လည်ပတ်စရာနေရာများဖြစ်သည့် ချင်းရိုးရာ အိမ်နှင့် ရှေးဟောင်းပစ္စည်းများ ပြသထားသည့် ဗန်ဟရဲပြတိုက်၊ အမေရိကန် နှစ်ခြင်းခရစ်ယာန် သာသနာပြု အမွေအနှစ်များ၊ ကျောက်တုံးဖြင့် ပြုလုပ်ထားသည့် ခရစ်ယာန်ဘုရားရှိခိုးကျောင်း၊ ချင်းရိုးရာ ဆိုးဆေးနှင့် ရက်လုပ်သည့် အိုင်ဒီး ရိုးရာယက္ကန်းအိမ်၊ သီးမြစ်လွင်ပြင်စသည်တို့ကို သွားရောက်နိုင်ပါသည်။ နေ့လည်စာအနေဖြင့် ဒေသခံ လက်ဖက်ရည်ဆိုင်၌ ပြောင်းဖူး နှင့် အသားရောပြုတ်ထားသော ရိုးရာအစားအစာဖြစ်သည့် ဆာဗူးသီးအား သုံးဆောင်နိုင်မည် ဖြစ်ပါသည်။ ထို့နောက် ရုန်းတောင် နှင့် ဟားခါးမြို့ ရှုခင်းသာမှ နေဝင် ဆည်းဆာ နှင့် တိမ်ပင်လယ်ကို ကြည့်ရှုနိုင်မည်ဖြစ်ပါသည်။ ညစာကို ဒေသစားသောက်ဆိုင်တွင် သုံးဆောင်နိုင်ပြီး တည်းခိုခန်း၌ ညအိပ်ရပ်နားရမည်ဖြစ်သည်။

ဆဌမနေ့                      ဟားခါး – မန္တလေး / ရန်ကုန်

မနက်အစော အခန်းအပ်ပြီးပါက လက်ဖက်ရည်ဆိုင်၌ မနက်စာအဖြစ် ပူရီ သုံးဆောင်နိုင်ပြီး ဇေတဝန် ဘုန်းကြီး ကျောင်းနှင့် ကျောက်ဖြစ်ရုပ်ကလပ်အဖြစ် တည်ထားကိုးကွယ်သည့် ရုန်းတောင်ဘုရားတို့ကို သွားရောက်ဖူးမျှော်နိုင်ပြီး ဟားခါးမြို့မဈေးတွင် ချင်းရိုးရာလက်ဆောင်ပစ္စည်းများ ဝယ်ယူနိုင်မည်ဖြစ်သည်။ ထို့နောက် ရန်ကုန်သို့ ပြန်မည်ဆိုပါက မနက်(၉)နာရီခွဲ မတိုင်ခင်နှင့် မန္တလေးသို့ ပြန်မည်ဆိုပါက ညနေ(၃)နာရီခွဲ မတိုင်ခင်အချိန်များ တွင် ဟားခါးကားဂိတ်သို့ သွားရောက်ရမည် ဖြစ်သည်။